Sony ~ 品牌崩壞

Share Button

一個品牌做幾多廣告, 產品幾好都無用, 攞部用咗13個月剛過保用期嘅 Sony Z3 去 Sony 係銀城嘅維修中心整, 原因係插耳筒聽歌, 郁到耳筒自動停歌, 上去要俾 $150 檢查費, OK, 跟住有位鄭小姐打返俾我話部機個底板有問題, 電池唔穩定, 個Mon有白點, 要整$2800, 無嘢呀!舊電用成日都無事, 打電話無事, 用app無事, 除咗個headphone位, 仲要唔係聽唔到歌, 係接觸不良導致停音樂, 要收$2800?

唔肯之餘佢話再check, 跟住話唔換 Mon 都要收$1500, 我堅持只換 headphone 位, 佢話check 咗再打俾我。

鄭小姐第二個電話打嚟話只換 headphone 位$62, 但係無保養, 無咗防水功能, 無端端換 headphone 位點解會無咗防水功能?佢話部機邊位花咗有凹位, 我話你同事今朝收機時無話部機花咗凹咗, 做乜部機會凹咗?(我部機長期用包邊殼, 無凹無花), 跟住佢又話check咗再覆我。

過咗7:30PM都未覆, 我打俾鄭小姐, 佢話揾人再覆我,於是8:00PM後有位劉生打嚟, 話部機整返底板等要$1546, 因部機凹咗影响無咗防水功能, 而張維修工作單上Body Condition上有寫明 WH PROTECTOR (FRONT: NORMAL, SCRATCH; BACK:NORMAL, SCRATCH), BODY SCRATCH,我亦簽咗名, (好離普, 佢同事俾張單我剩叫我對名, 電話, 機身號碼, 同埋佢highlight 咗: 如維修玫保護貼有損佢哋唔負責, 完全無提過部機有凹有花!之前試過整相機, 整TABLET, 如果部機有凹有花, 收機嗰個一定講清楚, 唔會咁鬼鼠! ), 好, 俾你屈我簽咗名, 咁都係SCRATCH,即係花咗, 無話凹咗, 佢死口話SCRATCH係花損, 花損即係凹, 咁你話乜都得架啦!凹係CONCAVE,HOLLOW,SUNKEN,DENTED, 點都唔係SCRATCH囉!佢話:「 我話花損係凹就係凹」, 真係無得頂!

佢仲話同事收咗機會即刻交俾師父, 師父會即時影相, 張相證明部機係凹咗, 我部機明明無事, 交咗俾佢哋就凹咗, 佢話張相有時間可以證明, 佢睇完時間話張相7:00PM影嘅, 但我一早11:00AM就去放低部機, 即係唔係「同事收咗機會即刻交俾師父, 師父會即時影相」啦!疑點二係佢同事鄭小姐5:45PM就打俾我話師父check 完部機要收$2800去整, 我絶對有理由懷疑佢哋整凹部機先至影相!

跟住佢話師父好忙, 要做其他機, 到check我部機嘅防水功能時先至影相(因位凹位影响防水功能),個張係6:30PM影嘅, 我問佢: 真係6:30PM影嘅?, 佢實牙實齒話:係!但佢同事鄭小姐打俾我話部機防水功能有問題係6:06PM,無理由佢同事打完嚟師父先check機吓嘛!

上網睇返原來銀城個間維修中心係SONY外判嘅, 屈錢事件並非首次, SONY 咁大個牌子, 容許有人咁樣破壞公司誠信, 破壞客人關係, 叫人以後仲點敢買SONY嘅產品!

IMG_5744a

Share Button